Las casas pervenda havevan mintgina in clavau. Il plevon haveva vaccas. Els fagevan era fein sez. Els havevan in scussal vert. Els havevan era praus. Nus havevan era praus da tschella vart dil Rein, che sudevan alla pleiv.

Inaga eis ei stau aschi ina gronda calira

ch’ei haveva dau nuot, schuber nuot. Epi han els concludiu silla pleiv ch’i vegni vendiu quels praus, “quels redan nuot”. Igl augsegner ha getg ch’ei emporti nuot ad el. Quei ei iu a Cuera e pli tard eisi vegniu ensi ch’ils da Surrein hagien vendiu sulom ch’els havevien buca il dretg. Quei seigi scumandau senza lubientscha digl ordinariat cheugiu. Nus havein scret engiu, uestg Georgi ha getg ch’el rugaleschi schon quei e lu eisi era stau bien. Quei eran ils avantatgs ch’ins haveva.

Quei ei stau la davosa vacca dil prer. La fumitgasa ha getg ch’ella lessi era ina vacca. Quei era ina tudestga. E cheu haveva ella priu giuado in zeiver per dar aua, jeu sai buc sch’ella mulscheva quella. Quei ei stau la davosa vacca e quei ei stau mellinovtschien e… tegn jeu, sai gnanc cu exact.