Barclamiu Pelican

Barclamiu Pelican ei naschius 1927 a Ligiazun. Siu frar vegl ei morts cun siat onns e siu bab ei morts cuort suenter che Barclamiu ha giu terminau la scola obligatorica. Gia baul ha el perquei surpriu il menaschi puril. Dils siat fargliuns ei ha era sia sora Onna fatg la pura a Ligiazun ed els dus han menau il menaschi communablamein entochen la pensiun. Sper far il pur ei Barclamiu staus decennis alla liunga cassier da vischnaunca e meinacudisch dalla societad da tratga. Sco passatemps ha el scret biaras poesias ch’ein era vegnidas publicadas.

Barclamiu Pelican ei morts 2017.

 

Gabriel Alig

Gabriel Alig ei naschius 1925 a Vrin vitg. Entochen sia scolaziun da guardiacunfin ha el stuiu gidar a casa el menaschi puril da ses geniturs. El ha fatg il fumegl, ei staus ad alp ed ha luvrau sil baghetg suenter il temps obligatori da scola. 1946 ha el fatg la scola da guardiacunfin a Liestal ed ha luvrau 37 onns oravontut al cunfin sid ed ost dalla Svizra . Lu eis el staus aunc 5 onns tier la direcziun dalla duana a Cuera. El ei carschius si cun 6 fargliuns e cun sia dunna Käthi ha el giu 7 affons. Ses hobis ein ni ein stai: alpinissem, sittar, apicultura e catscha.

 

Simeon Alig

Simeon Alig ei naschius 1928 a Vrin-Cons sco fegl da purs. El ei staus in dad endisch fargliuns ed in dils emprems da Vrin che ha insumma fatg in emprendissadi. Suenter la Secunda uiara mundiala ha el empriu da scrinari a Lai. Suenter ina greva malsogna ed ina cura a Tavau ha el entschiet a luvrar sur sesez. El ha construiu in agen luvratori denter Vrin e Cons. Quella scrinaria ha el engrondiu diversas gadas. La finfinala ei l’interpresa vegnida aschi gronda ch’el ei sedecidius da transferir quella a Vrin vitg. El era sespecialisaus sin la construcziun da finiastras ed oz meina siu fegl cun success l’interpresa.

 

Hermina Alig-Casanova

Hermina Alig-Casanova ei naschida 1932 a Vrin vitg. Ella ha giu quater soras ed in frar. Ina da sias soras ei morta cun siat ed in’autra cun 17 onns. Ils geniturs han fatg ils purs ed il bab ei staus caluster. Duront la stad e suenter il temps da scola ha ella stuiu ir a fadiar ordvart per sustener cun sia paga la famiglia. Cun 24 ha ella maridau Isidor Alig ed ei setratga a Cons ed ha fundau leu ina famiglia. Sper la lavur el menaschi puril e l’educaziun da siat affons ha ella tessiu dabia ed ha era vendiu ses products.

Hermina Alig-Casanova ei morta la stad 2016.