Tgei eran ils puncts culminonts dil temps da voss’affonza?

Sontga Clau, Nadal e Daniev. Sontga Clau dalla notg vegneva lu culs schenghetgs e da Daniev devi in per raps. Da mes onns deva negin pli dad ins e da dus raps, il normal eran tschun raps e tier parents devi 10 ni forsa schizun 20 raps. Pil pli devi da biemaun teila per caultschas pils buobs e per rassas per las mattatschas. Il bambin vegneva buca cun bia. Persuenter devi, viaden egl october, che nus survegnevan d’ina famiglia dalla Bassa in pac cun empau victualias e gliez era in deletg. Sin quels pacs dalla parentella ni dils fargliuns egl jester spitgav’ins vess.

 Duront ils firaus alla fin digl onn eri buca dad ir a scola, denton da passentar biaras uras en baselgia e sch’ins fageva buca quei ch’era cumandau deva ei castitgs suarai.

Enzatgei che fageva vegnir miez narrs mei sco buob era igl ir e prender penetienzia. Mintga mes’ura vegneva pervergiau. Uss era ei aschia che quel che vegneva il davos vidlunder da prender penetienzia astgava buc ir a pervergiar avon ch’el haveva buca fatg siu castitg, el stueva spitgar mintgamai ina mes’ura tochen ch’el era l’autra gada en roda.

A nus haveva sur Luis era scumandau dad ir ora giu dallas truccas e da porta pintga ora avon che la glieud era buc ora. Albin ed jeu havein giu fatg quei inagada e survegniu in castitg da scriver giu tut quei da rispunder messa diesch gadas. Suenter havein nus saviu il confiteor ed il sucipiat ch’ins saveva schiglioc buca. Il mender castitg era sch’igl augsegner metteva ils affons avon la raspada en schanuglias sils pass ni il pir era da schizun stuer mirar anoragiu. Ils augsegners ed ils scolasts eran persunas d’autoritad. Ils augsegners valevan sco persunas benedidas ed eran era buca megliers che nus. Era en scola vegneva dau bia fridas.