Maria Solèr-Derungs

Jeu sun naschida 1933 a Surcasti e sun stada la veglia da nossa famiglia. Nus essan stai sis fargliuns, las duas schumellinas ein denton mortas ch’ellas eran aunc pintgas ed in frar ei sedisgraziaus cun 11 onns. Mia mumma ei morta cun 46 onns. Jeu vevel lu 20 onns. En quei senn sun jeu stada empau la mumma da mes fargliuns giuvens.

Jeu mezza hai giu dus fegls ed ina feglia. Jeu sun vegnida baul vieua, miu um ei morts cun 35 onns dil cancer. Pli tard sun jeu maridada si Camuns e fatg leu la pura. Mia secunda lètg e stada senza descendenza. Era miu secund mariu ei morts relativamein baul, aschia che jeu sun dapi biars onns puspei vieua. Jeu hai treis biadis. In da quels viva a Costa Rica, mintgaton viseta el sia tatta a Camuns.

Simon Derungs

Simon Derungs ei naschius 1949 e carschius si a Surcasti, leu nua el ha frequentau la scola primara. Suenter 3 onns scola secundara ad Uors ha el fatg in emprendisadi sco mecanist d ‘utensils tier la fatschenta Landis & Gyr a Zug. Suenter la scola da recrut sco mecanist d ‘armas ha el luvrau treis onns a Horgen ed a Glion, pli tard 9 onns sco mecanist da maschinas da lavar Schulthess, midau tier la “Gross und Leihwäscherei” a Glion e luvrau leu 8 onns sco mecanist da fatschenta e sco davos menau 20 onns la producziun.

Simon Derungs ei maridaus, ha duas feglias e 5 biadis. Ses hobis ein la musica instrumentala (fundatur dalla musica da Suraua, da quei 27 onns sco dirigent), viagiar e la historia locala.