Quei era schon pli fetg teniu dapart. Las dunnas mavan bu bia en nuegl, lez era plitost la lavur dils umens. Ellas eran lu plitost en casa ed ils umens buc.

Lezs vevan ina casarina sch’els eran persuls. Jeu sai mo cu nus eran si misès, lu scheva miu frar “oz cuschin’jeu si misès, oz ston las dunnas bu cuschinar”. Quei fagev’el bugen. Lu stuevan nus enqualga rir, el mava lu magari o egl uaul, vesevan nus cu nus eran sil funs. El mava cun ina scadiola ni zatgei epi schevan nus lu “el va aunc o pil dessert”. El veva lu adina in plascher da far zatgei. Aber a casa schon adina las dunnas che cuschinavan.

Ei era schon plitost ils umens che schevan co ei seigi da far.  En famiglia tier nus er’ei bu aschia. Il bab scheva bia alla mumma. Aber las dunnas vevan da dir nuot sin vischnaunca, quei era il domini dils umens. President da vischnaunca vegneva il bia in ch’era in tec scolaus. Ei era schon plitost ils umens che vevan da dir tgei che mava atras. Jeu sai aunc dils geniturs ch’els raschunavan mintgaton da zatgei ch’ei stoppien dumandar igl augsegner.