Tgei has Ti fatg suenter haver bandunau la scola?

Jeu vess bugen empriu da tgirunza. Mia mumma ei denton vegnida malsauna ed jeu hai stuiu star igl emprem onn a casa. Suenter sun jeu ida giu Cuera en plazza tier maior Lombriser per la mudesta pagaglia da 80 francs il meins. Silsuenter sun jeu stada engaschada  tier la famiglia dil dentist Caviezel e gudignavel leu 150 francs il meins.

Quei era la dètga signuria. Jeu vevel da far il tenercasa e survir las tschaveras en scussal alv e cun vonns. Jeu mezza astgavel denton buca magliar ensemen culla famiglia ed era buca duvrar lur tualetta. En mintga stanza deva ei in telefon. Jeu vevel  ina pintga combra separada si sut tetg, ordeifer la habitaziun. Quei era schon empau in auter mund ed jeu schavel schon empau encrescher per Surcasti.