Il habitar el marcau secontrastava da lez temps pia era ualti fetg cul comfort ellas casas purilas a Surcasti?

A Surcasti vevan nus da lezs onns adina problems cun l’aua. Entochen ch’ins ha buca giu realisau il conduct da Seglias igl onn 1963 havevan nus scartezia d’aua. Ei deva buca aua en casa. Nus stuevan ir per aua el begl dil vitg ni schizun tochen oragiu tier la fontauna sil crest sper la baselgia da s. Luregn. Il resti vegneva lavaus ordaviert el begl dil vitg e quei era igl unviern en tutta ferdaglia. Las dunnas han schon stuiu far atras bia da quei temps. Era las cuschinas eran freidas e las preits dallas casas mal isoladas. Cuschinau vegneva sin ina platta da fiug ed ei deva sulet ina pegna scalegl en stiva. Il comfort era pigns e las dunnas vevan tuttavia buca sempel pli baul. Ellas savevan denton da nuot auter ed eran aschia cuntenzas cun lur destin.

Tgei spisas eran las pli frequentas en ina famiglia purila?

Ins targeva a nez cunzun ils products ord igl agen menaschi. Quei era cunzun carn, caschiel, pischada e frina. Ins empruava da far il meglier ord quei ch’ins veva sez. En stizun cumpravan nus silpli empau pulenta, ris, zucher e sal. Pil pli en entirs sacs. Las tschaveras principalas da quei temps eran capuns, maluns, tatsch, bizochels, pèsch maghers e veschlas meila. Damai ch’ils umens luvravan savens egl uaul, ellas aclas ni fagevan lavur cumina vid vias e vegnevan aschia da miezgi buca a casa era ei savens dad ir cun gentar cun canaster e honta el liug.