Ferton che biars purs durmevan igl unviern si cuolm ed ellas aclas e mavan la sera magari a vitg in tier l’auter, eran las dunnas persulas a casa. Tgei fagevan quellas las liungas seras d’unviern?

Ellas havevan da haver quitau dils affons, perver ils animals da casa, lavar e cuntschar. Biaras filavan e tessevan, fagevan caltschiel e procuravan sezzas per sempels battegls.

Da quei temps astgavan las mattatschas e las dunnas buca trer en caultschas, era buca dad ir a scursalar ni cun skis. Per schurmegiar dalla ferdaglia duvrava ei aschia grossas rassasa, caltschauls liungs e capetschas cauldas.

Co steva ei insumma culla emancipaziun dallas dunnas da quei temps en in vitg puril? Eran ellas suttamessas totalmein als umens ni vevan ellas ils medems dretgs?

En quei grau sai jeu buca selamentar. Miu bab veva gronda capientscha per las dunnas ed en famiglia savevan nus risdar empau diltut. Nus dunnas stuevan denton era surprender responsbladad, seigi quei en casa ni el menaschi puril. Las decisiuns impurtontas vegnevan pridas communablamein, pigl auter era mintgin responsabels per sia domena, las dunnas per la casa ed ils umens pil nuegl e la cultira.

Da Tiu temps da giuventetgna havevan las dunnas aunc buc il dretg da votar. Has Ti spitgau vess da survegnir quei dretg?
Spitgau vess buc. Cun nus vein denton survegniu il dretg da votar sun jeu adina ida a votar. Suenter esser maridada e secasada a Camuns sun jeu era stada leu plirs onns ella suprastonza communala. Jeu sun adina sespruada da segidar culla cuminonza.

A Camuns hai jeu lu era surpriu il presidi dalla Uniun da mummas culla quala nus organisavan mintg’onn in’ entira retscha da cuors. Quels vegnevan lu era susteni finanzialmein dil cantun. Quei ei stau bia bialas seras da sentupada e cumpignia denter las dunnas dil vitg. Ei deva secapescha era da quellas che stevan dalla largia e fagevan buca part da quellas sentupadas. Era quei era d’acceptar.