Ti eis staus fundadur e biars onns dirigent dalla Musica instrumentala da Suraua. Co eis ei vegniu aschi lunsch?
A Surcasti vevan nus negina musica. Jeu sun denton adina staus in fanaticher da musica da stuors. Per mei era ei mintgamai in eveniment tut special sche la Musica da Vignogn vegneva giu Surcasti per embellir ina fiasta ecclesiastica ni l’autra. Era mavel jeu stedi a concerts dallas musicas dil contuorn.
Cu jeu sun turnaus si Glion hai jeu finalmein giu la pusseivladad d’emprender da sunar in instrument e sun allura entraus beinspert ella Musica dil marcau da Glion. Jeu erel in grond fanaticher e trenavel mintga sera a casa e hai cheutras survegniu ina buna buccatura. La finala hai jeu sunau 9 onns ella Musica da Glion. A Suraua vessen entgins camerats era giu gust d’emprender da sunar in instrument. Perquei vein nus batlegiau entgins instruments vegls da differentas musicas existentas. En ina pintga gruppa havein nus empriu da sunar differents instruments e preparau treis chorals che nus vein allura sunau sco surpresa a caschun d’ina sera famigliara. La surpresa ei gartegiada ed ei ha dau persuenter in grond hallo el publicum.
Quei ha animau da cuntinuar e la finala motivau da fundar igl onn 1978 la Societad da musica Suraua cun buca meins che 17 interessents. Era la populaziun ha susteniu nus fetg, cunzun era finanzialmein. 1982 vein nus dau igl emprem concert ensemen cul giuven Chor mischedau Suraua. 1981 vein nus sunau l’emprema ga da cumin e 1983 vein nus priu part per l’emprema ga a Flem cun bien success ad ina fiasta da musica.
Tut en tut sun jeu staus 46 onns en las musicas da Glion ni Suraua e la finala era dirigiu sez buca meins che 27 onns la Musica da Suraua.
Ti ei naschius e carschius si a Surcasti. Quals eran ils eveniment impurtonts el vitg puril da lezzas uras?
Quei eran principalmein las fiastas ecclesiasticas, cunzun Sontgilcrest e Perdanonza. A caschun da quellas duas fiastas fagevan ils mats parada en mondura militara e las mattas fagevan tschupials per la baselgia e purtavan sezzas era tschupi. Da Sontgilcrest vegnevan ils ueibels ch’eran gest ord scola recepi ella cumpignia da mats, pli tard ella Uniun da giuventetgna. Surcasti ed Uors han adina giu fatg parada cumineivlamein, damai ch’ils dus vitgs formavan ensemen la pleiv da S.Luregn. Il capitani mava en turnus, dus onns a Surcasti ed in onn ad Uors.
La sera da Sontgilcrest envidavan ils mats las mattauns «a beiber». Secapescha che quei succedeva en presenza dil plevon che fuva era preses dalla uniun. Da quellas sentupadas vegneva magari era cantau e saltau. Suenter mesanotg mavan nus mats en pitgas gruppas a puschegn a casa tier las mattauns.
Pli tard han ins organisau seras famigliaras, che eran denton resalvadas, per motivs da plaz mo als carschi. Leu fageva la giuventetgna lu era teater. Culs daners recaltgai fagevan nus mintgaton in pign viadi. Ord l’Uniun da giuventegna fundada 1972 ei la finala era il chor mischedau Suraua naschius. Suenter la reuniun dallas scolas e la realisaziun dalla casa da scola nova communabla ad Uors han ils vitgs da Suraua fatg leu communablamein sera famigliara.