Co eis ei stau culla elecziun da clamada?

Sco fegl vegl vess jeu magari giu interess da far il pur. Miu bab ha denton manegiau che quei seigi nuot per mei cun mia struha da fein. El vuleva exnum che jeu mondi alla Scola cantunala e daventi scolast, sco quei che era miu tat era staus. Miu frar pli giuven seigi empau pli ferms ed aschia pli adattaus da far il pur, haveva bab manegiau. Jeu vess denton giu mustgas da sunar harmonica da quei temps ed hai detg che jeu seigi pia promts dad ir alla scola cantunala, denton mo sche el cumpri per mei ina harmonica. Per motivs finanzials ha el denton renviu quei giavisch. Aschia che quei tema ei staus, silmeins pil mument, giud meisa.

Duront il temps da scola zambergiavel jeu magari bugen cun differents materials. Aschia vevel jeu giu endrizzau en hisli ina cazzola cun battaria ch’ins saveva envidar e stizzar cun ina guota. Quella invenziun veva lu era purtau a mi il surnum “electricher”. Suenter ch’il cussegliader da clamada veva giu enderschiu da quei experiment ha el manegiau che jeu duessi far in empredissadi tier la Landis&Gyr a Mustér. Quels lavurien cun apparats electrics ed enquerien adina puspei emprendists.

Miu bab era zuar nuota propi incantaus da quella proposta, mo per mei constava ella. Ils emprems dus onns d’emprendissadi hai jeu absolviu el menaschi a Mustér ed ils dus suandonts ella centrala  a Zug. Leu hai jeu giu la pusseivladad da frequentar differents cuors da perfecziun sil sectur dalla electronica ed havevel plascher da quella professiun.

Ti ei denton tuttina sedicidius da turnar beinspert anavos a Surcasti?

Jeu sun adina staus fetg rentaus ed attaschaus al vitg patern, schavel schon empau encrescher e turnavel aschia mintga fin da jamna a casa. Jeu havevel era l’intenziun da puspei turnar aschi spert sco pusseivel en Surselva. Damai che la firma Grob ch’era gest s’etablida a Glion encureva da quei temps luvrers sun jeu s’annunziaus ed hai survegniu la plazza. En quella firma sun jeu sespecialisaus principalmein silla contrucziun d’utensils ed hai luvrau leu cun plascher plirs onns e saviu emprender in tschuppel caussas novas.

Ei era denton adina da luvrar endadens, quei che plascheva meins a mi. Aschia hai jeu encuretg ina nova plazza. Duront 10 onns sun jeu allura staus engaschaus tier la firma Schulthess sco emploiau da servis e reparaturas da maschinas da lavar egl entir cantun Grischun. Cul temps vegnevan ils liungs viadis adina pli stuffis e stentus. Damai che la «Gross-und Leihwäscherei» a Glion encureva gest in mecanist da maschinas sun jeu s’annunziau ed hai survegniu quella plazza. Quella funcziun ei stada colligiada cun grondas midadas tecnicas. El temps da sesiun aulta tuccava ei magari da luvrar 6 gis ad jamna e 12 uras a gi, per allura saver cumpensar las sururas en periodas pli ruasseivlas.

Duront 10 onns sun jeu staus menader dalla producziun da quei menaschi. Quei ei stau in stregn, denton bi temps cun ina buna collaboraziun cul persunal che derivava lu per gronda part ord la regiun. Damai che la tecnica vegneva adina pli cumplicada e la lavur adina pli pretensiusa sun jeu staus leds da haver saviu ir anticipadamein en pensiun. Aschia hai jeu finalmein giu dapli temps per sededicar pli intensivamein a mes hobis: la musica e la historia.