Per la Lumnezia en general vesel jeu tuttavia in bien avegnir. Cunzun las vischnauncas da Cumbel, Morissen, Vella, Degen e Vignogn ch’ein fetg maneivlas ina da l’autra han in bien svilup economic. Mender stat ei en quei grau cun Lumbrein che era pli baul la pli gronda vischnaunca lumneziana e cunzun culs loghens perifers sco Vrin e Suraua. Ella gronda part dils vitgs lumnezians dat ei oz dapli habitaziuns da vacanzas che habitaziuns occupadas d’indigens. Quei dat a mi schon da patertgar. Biars giuvenils han buca pli interess da fundar famiglia, secasar el vitg, renovar las casas veglias ed entrar ellas uniuns. Era la vischnaunca stuess nezegiar el avegnir meglier sias atgnas localitads publicas e sestentar dapli per crear habitaziuns pagablas per indigens. Legreivel ei denton che nus vein en nos vitgs lumnezians biars pendularis che lavuran bein ordeifer, che mantegnan denton lur domicil el vitg e dattan aschia veta a quel.