Co steva ei cul tscheiver a Surcasti?

Mats e mattauns fagevan schon empau tscheiver. Ei deva magari in sault ni l’auter. Giuvens e giuvens sentupavan ella ustria e fagevan enqual sault suenter la musica dil radio ni dil giraplattas. La sera da Sontgilcrest vegnevan ils giuvens recepi ella cumpignia da mats. Cheu eran era las giuvnas presentas. Era il plevon era presents e mirava che la distanza denter las schlatteinas e la morala vegnien respectadas. Suenter mesanotg mavan ils giuvens en gruppas tier las giuvnas a puschegn.

Ils affons fagevan magari bagordas cun mascras, tiels carschgi era quei denton buca usitau. Da miu temps da giuventetgna deva ei aunc buca seras famigliaras. Suenter ch’ils vitgs da Suraua han survegniu ina casa da scola nova ad Uors han ils vitgs vischinonts fatg sera famigliara cumineivla ad Uors. Il chor, la musica e l’uniun da giuventetgna han surpriu alternontamein l’organisaziun e procurau per il program divertent.

Deva ei pli bau usits specials a Surcasti?

Da Sontgilcrest e da Perdanonza fagevan ils mats parada. La sera mavan ei a beiber in sitg ella ustria ed envidavan era en las mattauns per star empau da cumpignia. Da temps e temps fagevan nus era teater. Surcasti haveva era in chor, in temps schizun dus.

A Surcasti deva pli baul bia persunas ledias. Cu ina tala mureva vevan ils mats dad ir per dascha e las mattauns da far in tschupi per metter sil vischi. Quei fuva era ina beinvegnida caschun per saver ir la sera in tec en sortida e star in tec da cumpignia. Las sondas sera vegnevan ils mats dil vitg, denton magari era quels dils vitgs vischins da Uors, Degen e Tersnaus a mattauns. Magari saltavan e cantavan nus era en cumpignia.