Ti denton era staus engaschaus ella pleiv?

Sco emprem uffeci hai jeu giu surpriu il presidi dalla pleiv, cunzun en vesta alla restauraziun dalla baselgia parochiala da s. Luregn ch’era sin rucca. Schegie che la restauraziun ha custau a mi dabia gnarva ha ella svegliau en mei igl interess per la historia. Duront miu presidi vein nus era cumpletau e remplazzau il tuchiez existent cun dus zenns novs. Pli tard havein nus schizun saviu acquistar in zenn grond per cumpletar igl accord. Quei ei stau pusseivel grazia ad ina generusa donaziun.

Ti era staus biars onns president dalla pleiv. Co giudicheschas Ti la situaziun actuala e vegnenta sin plaun ecclesiastic?

La religiun ei e resta per mei in’impurtonta petga ed ina directiva empalonta. A mi fa igl avegnir dalla Baselgia schon empau quitaus, quei buca exnum per il motiv che adina pli paucs van en baselgia. En quei grau han ins bein surfatg empau pli baul. Il pli fetg dil desinteress actual piteschan la cuminonza e la cultura.  Ins sto era renconuscher igl engaschnent dalla baselgia sil camp dalla scolaziun e dalla lavur sociala. Ditg avon il stadi ei la Baselgia s’engaschada per la scolaziun dil pievel, ella ha fundau spitals e casas da vegls ed ella ei s’engaschada per numerusas ovras socialas e caritativas. Bia glieud ha prestau bia lavur voluntaria e gratuita. Quei ei veramein stau in agid vicendeivel en favur dils fleivels en nossa societad.

Damai ch’ils geniturs van buca pli en baselgia, eis ei buca da sesmavegliar che era ils affons mauncan. La cuminonza dat aschia adina dapli dapart en nos vitgs. Era la Baselgia sezza sto denton empruar dad ir cul temps. Cunzun meretan las dunas dapli attenziun e renconuschientscha.  Jeu sedamondel era tgi che mantegn in gi nos custeivels edifecis sacrals sche adina daplirs sortan dalla Baselgia,