Ti has denton era fatg l’ustiera?

Cu jeu erel giuvna deva ei a Surcasti schizun treis ustrias. Ils luverdis marschava denton buca las massas. Silpli in cumiss ni l’auter che vegneva a dar in sitg, ni era a gentar. Aschia eran ils ustiers era sfurzai da far dasperas empau il pur ni ch’igl um mava ordeifer a luvrar.

Sonda e dumengia deva ei empau dapli veta ellas ustrias. Giuvens e giuvnas ch’eran egl jester turnavan la fin da jamna stedi a casa e gudevan savens da star da cumpignia ell’ustria. Il sortiment bubrondas era restrenschius. Tiel vin dominavan las marcas Veltliner, Kalterer e Lambrusco. Ils giuvens preferevan plitost la gervosa, las giuvnas auas dultschas e caffè. L’ustria vegneva frequentada da lezs onns cunzun dils umens. Pér els onns sissonta han era las dunnas entschiet a sentupar ell’ustria, magari per dar in jass.