Tgei rolla giugava il plevon e la baselgia da quei temps?

Ei era da cuorer tugi e traso en baselgia. Mintga gi vevan nus dad ir a messa ed a rusari ed ina gada il meins a prender penetienzia. La dumengia haveva ei num ir la damaun baul a pervergiar e silsuenter a messa. Suntermiezgi era viaspras e la sera rusari. A quellas devoziuns astgan nus mai muncar.

Ina dumengia suenter viaspras eran nus i si Degen per prender part d’ina lottaria cumbinada cun bazar. Nus vevan giu legher e schizun ughegiau da saltar intec suenter la musica dil radio. Nus eran la finala s’entardai bravamein e turnai anavos memia tard per ir a rusari. Quei veva lu dau las dètgas reprimandas da nos geniturs ed in exordi suarau dil plevon. Tonpli che in um da Degen veva giu telefonau a miu aug Balzer, informond ch’ils mats e las mattauns da Surcasti seigien si Degen e mondien per las ustrias entuorn.