Sco historiograf local ei Ti era sededicaus intensivamein allas genealogias dallas famiglias, dils cussadents dallas casas da Surcasti e dalla historia e cultura da Suraua. Tgei ha dau a Ti igl impuls persuenter?

La historia locala ha adina interessau mei. Suenter la pensiun hai jeu giu dapli peda da s’approfundar ella materia. El rom dalla Pro Suraua vevel jeu giu teniu in referat che ha interessau in vast publicum, quei che ha allura motivau mei da s’occupar aunc pli intensiv culla historia dil vitg da Surcasti, culla pleiv da Uors/Surcasti, cul Bogn da Peiden e culs vitgs da Suraua. Jeu hai era giu l’occasiun dad ir sils fastitgs dils emigrants da Surcasti ella America. Suenter che mias duas niazas Silvana e Daniela ein sepurschidas da segidar hai jeu la finala ughegiau d’edir la publicazun “Da temps vargai. La historia da Surcasti/Suraua”.

Ti eis denton era staus igl iniziat digl Archiv cultural Lumnezia?

En Lumnezia han ins adina puspei udiu ch’ei fuss cunvegnent da rimnar caussas e documents vegls avon ch’els mondien en emblidonhza e vegnien dismess. En connex culla emigraziun hai jeu era giu contact cugl archivar communal Tujetsch Tarcisi Hendry. Lez ha animau mei da far enzatgei semegliont en Lumnezia. La damonda cardinala ei denton stada nua installar quei Archiv cultural lumnezian. Jeu hai dau d’entellir che jeu fussi sut circumstanzias promts da realisar e tgirar quei archiv sche quel vegni installaus a Suraua. Ils responsabels han la finala dau triev a quei giavisch, aschia che jeu hai saviu rimnar el decuors dils davos 7 onns dabia material ed installar igl archiv en ina stanza dalla anteriura Casa da scola ad Uors.