Davart temps liber, uiara ed avegnir a Vrin

Barclamiu Pelican
Barclamiu Pelican © Gieri Antoni Caviezel

Co steva ei cul socialesser? La finamira dalla vischnaunca era da haver aschi paucs cass socials sco pusseivel.

Gie, gie. Quei leu cumandava il cantun. La gronda part surprendeva il cantun aschia ch’ei restava buca da pagar las massas tras la vischnaunca.

Tgei fagevas vus el temps liber, sch’ei deva insumma quel?

Leger! Nus havevan schon empau cudischs en casa. Lu devi aunc la Gasetta Romontscha inagada ad jamna.

Sport, era quei in tema lu?

Quels ch’eran ord scola e havevan buca fatg la mustra stuevan ir a far sport. Tgei ch’ins stueva far tut sai jeu buca, restai ein ils „Liegestütz“ ni alzar las «Hantlas» e stuschar la culla. Quei era cumandau dil stadi. 

Co haveis vus resentiu la Secunda uiara mundiala?

Ils purs stevan buc il mender. Culs luvrers mavi mender. Enzacons onns han quels che havevan buca sezs funs arau giun Tgiern e mess truffels. Quei ei denton buca stau in temps extraordinari per nus mattitschem.

Vrin / Vanescha
Vrin / Vanescha

Co vesis vus il futur dalla fracziun Vrin e ses uclauns?

Quei va giu. Cheu gleiti negin che stat pli. Forsa ein quels uclauns in gi mo mises pli. Jeu hai gronds dubis ch’ei seigi gleiti nuot e quei malgrad igl agid finanzial d’ordvart. Meglier vegni segir buca. Avon curont’onns havess jeu buca getg aschia. La realitad ei ussa aschia.