Mia sora gronda era naschida 1918, jeu sun naschida 1927. Ella era sco buoba che mava aunc a scola ils davos onns, stada el bogn en cuschina e lavava giu. Lu dev’ei buca maschina. Lu vevan ei schi bia ch’era occupau che las fumitgasas e fumeglia mavan ellas tegias dasperas a durmir.

Jeu vevel la combra sisum el spitg anen. Quei emblidel jeu mai, numera 94. Lezza cuchera vevan ei dau a mi.

La secunda sora ei lu stada bia si Tavau e si Frauenkirch. L’emprema veva fatg quei da Hotelfach a Luzern. Lezza ei lu era stada empau dapertutanavon.

Oh gie, tschella veva empriu da cuschiniera. Tavau era lu enconuschent sch’ei era buna cuschina. Lu er’ei lu massa hosps che vegnevan. Leu era massa da quels ch’eran malsauns e stuevan vegnir a far cura. Quei stueva secapescha esser cuschiniers che savevan tgei ch’era da far. Lezza ei stada in per onns sileu tochen ch’ella ei maridada

Mia sora era lu vegnida malsauna entras quei ch’ella era stada si Tavau. Ella veva survegniu in pneumo, mal sil lom e stueva ir tiel docter adina. Entras quei vevan nus survegniu quei radio da dr. Gion. Quei era zatgei nundetg. O jesses, in toc radio nausch. Televisiun era nuot, quei negin che tschintschava.

E Vus a casa, fageva Vies bab il pur?

Miu bab ha era fatg il pur. Nus mattatschas stuevan secapescha era gidar denteren. Jeu hai priu in per ga vacanzas la stad per vegnir a gidar.

En nuegl stuevas Vus era ir?

Bu bia, gliez fageva il bab schon. Mo tier las tgauras. Nus vevan las tgauras. Gliez era lu normal cu jeu vevel dad ir a scola, da miezdi stuev’jeu adina sche pusseivel ir a schar o ni a buentar las tgauras. Aschia mava quei. Quei era dapertut il medem.