Mes geniturs ein carschi si omisdus a Surcasti. Miu tat davart dalla mumma era in Camenisch da Morissen e mia tatta ina Albin da Tersnaus. S’entupai ein els dus el tmps ch’ els mavan per hotels a Lucerna. Cu els ein maridai ein els secasai igl emprem a Morissen.  Els ein allura vegni a Surcasti a habitar, dama ch’els possedavan leu ina quarta d’ina casa. Els ein i vinavon zatgei per hotels e silsuenter stai a casa ed entschiet a far in tec il pur.

Mia mumma ei carschida si ensemen cun in frar a Surcasti. Ella ha absolviu cuors dil tenercasa a Sargans e lu puspei turnada a casa. Il tat davart da miu bab era scolast e pur.

Miu bab ei suenter la scola populara staus zatgei giu Turitg a luvrar ed ei allura turnaus beinspert puspei a Surcasti. Leu el ha fatg entgins onns il fumegl el menaschi puril da miu tat ch’era morts prematuramein cun 59 onns. El era il giuven dils buobs d’ina famiglia da 14 affons ed ei aschia restaus leu cun la tatta ch’era vegnida vieua ed in frar ledi. Entgins onns suenter la maridaglia han els entschiet a far il pur sur sesezs. Da quei temps deva ei el menaschi puril neginas maschinas auter ch’in motor da segar, aschia ch’ei ha tuccava da far bia a maun.