Oz riani denton pli baul era quei doch moda che las femnas vevan bu en caultschas. È buobas, nus vevan mai en caultschas.E lu era scolast Camenisch vi Surrein che veva halt sias buobas. Lez ha detg “mias buobas van vi vitg a scola, jeu pretendel ch’ellas astgien trer en caultschas cu ei neiva. Cun schubas vegnan ellas gie malsaunas, quei datti buc!”

Basta jeu hai giu dad ir a scola cun schuba, sco tut las autras è. Jeu sun lu vegnida vi Rabius e giu da parter o la posta, leu è cun schuba. Ed in di veva quei halt neviu, halt ina nevada. E neveva vinavon. Jeu sun ida si e lu vevan nus las cassas principalas e denter auter era quella digl augsegner. Lu era quel vegnius niev, in dalla Lumnezia. Sur Arpagaus. Quel era conrector dil collegi da Schwyz. Quei era in perdert. Quei era in um che veva schon viu il mund e saveva bia. Sur Gieri. Quel era vegnius ora epi vev’el detg. “Vus matta, tgei tertgeis Vus. Daco veis Vus bu en caultschas? Tergei tuttina en caultschas da quels muments cu Vus veis dad ir tras la neiv e vegnis tut bletscha. Quei fuss bein pli practic per Vus.” Jeu hai lu dumandau: “gie lubesses Vus quei?” “oh quei secapescha, quei ei per Vies bien.” “Lu sche Vus essas cuntents, lu mirel jeu ch’jeu survegni in per caultschas, e lu immediat”. Epi sun jeu ida a casa ed hai raschunau quei alla Fräulein Caplazi. Lezza rieva la bucca pleina. Suentermiezdi hai jeu giu dad ir si cullas gasettas. Lu hai jeu udiu suenter ch’ei era en stiva dalla casa pervenda in chezzer paterlem dad umens. Dieunuardi!

Epi vegl il sur Gieri neudo e di: “Jesses, Vus matta, jeu stoi tschintschar cun Vus. Tedlei, hagies bu nuidis, neve buc. Aber jeu savevel buc. Quei ei pari bu moda che las femnas mondien entuorn cun caultschas. Neve tergei Vus buc en caultschas.” Aschia hai jeu tratg en schuba vinavon. Basta, ei era lu ils prers dalla Cadi ch’eran stai sin viseta tier Sur Gieri per la conferenza ch’ei vevan giu per la Cadi. E quels vevan fatg encunter, lu era quei aunc caussas! Oz, cu jeu raschunel quei dallas caultschas sa negin pli metter avon quei.

Quei ch’igl augsegner scheva, valeva?

Gie, oh quei Sur Gieri er’in flot ed in bien. Quei era veramein in um studegiau. Quel veva era instruiu ils scolars giu a Schwyz. Quei era tut glieud pli perderta che mava a scol’aulta. Jeu hai adina giu gronda simpatia per Sur Gieri. Gie, igl ei schon vegniu midau bia. Quei ei schon endretg.