La mumma ha adina parturiu a casa. Quei era lu ina dunna che vegneva e fageva il percasa. Aber quei fagev’ins nuota pli bia, ins realisava nuot. Tuttenina er’ei semplamein in pop en tgina. Ins selegrava ch’ins veva puspei in pop pign.

Jeu vevel ina cusrina e quella era la pintga en famiglia ed ella veva ina vischina ch’era è la pintga. Epi vesevan ellas magari che la hebamma mava. Epi schevan ellas “quella va adina mo tiels auters e quella ha era da purtar inaga a nus in pop”.

Inaga seigien ellas duas buobettas idas tier quella ed hagien detg ella dueigi era inaga purtar ad ellas in pop ni ina poppa. Ella hagi lu detg ch’ellas dueigien tschintschar cul bab e la mumma. Ellas hagien schon detg aber els veglien nuot. E cu ellas vesevan ch’ella mavi puspei zanuas vegnevien ellas tut viladas: “ussa va ella puspei enzanuas auter e vegn bu tier nus!”

Jau sai aunc che las dunnas spitgavan avon baselgia cul nievnaschiu. Igl augsegner veva lu da benedir la mumma ed igl affon avon ch’els astgaven ir en baseglia. Quei era in curios usit. Sco sche quei fuss stau ina puccau.