Co sto ins s’imaginar la veta d’antruras, pia vimiez il 20avel tschentaner?

Miu bab ha adina fatg il pur aber sco giuven ha el fatg dabia da scrinari. El ha adina fatg mobiglias ed iseglia e quei ha era surviu al puresser. Da quei da cumprar monis da tardens e da quei devi buca, schizun ristials (rusts) ha miu bab aunc giu fatg. Jeu havevel interess dil puresser e level era far il pur gia sco buob e lu eis ei buc iu biars onns che miu bab ei morts aschia ch’jeu hai buca giu biaras autras letgas. Tschaffen havess jeu era giu da far lavurs da scrinari. Il far il pur lu, muntava da far tut a maun. Gia la primavera era ei dad ir cun in pèr bos a trer si zugl ed arar, biaras gadas havev’ins magari mo in per mugiettas nauschas. Quei era da far bia manglas. Ins duvrava schon igl univern las mugias da mussar da trer ed ir per lenna mav’ins era cun ellas. Tschell’uisa eri bia dad ir a far lavur cumina, oravontut vid vias – ton da neiv sco da terrein – la stad per exempel eri da mantener la via tras la Stretga e la via dalla lavina l’Acla per ch’il zezen da Ramosa sappi ir egl uaul a trer la lenna per l’ Alp Ramosa.

Jeu sai s’imaginar che da lezzas uras fagevan ils pli paucs ina scolaziun da purs?

Ei deva schon la scola dil Plantahof. Miu scolast haveva cussegliau a miu bab da schar ir mei a studegiar da scolast e quei lev’jeu buca. Il davos havev’el getg da schar far silmeins ina scola purila. Jeu havevel denton il sentiment da haver giu scola avunda e sun era buc ius al Plantahof. Dus onns suenter ei miu bab morts e lu ha ei buca dau auter che da surprender il menaschi. Igl emprem fagev’jeu, denter far il pur, bennas, schliusas e da quei. Ina primavera hai jeu schizun fatg in giuv cunquei che l’auter era isaus e ruts. Miu bab haveva in dètg lenn d’ischi avon clavau e veva getg inagada ch’el vegli far in giuv dubel da paregl e quei hai jeu fatg. Quel ei aunc adina d‘entuorn.