Eras Vus era bia fargliuns en Vossa famiglia?

Na, nus essan stai quater, treis soras ed in frar. Il frar era in popet cul bab veva cavau truffels ed era ius giun tschalèr cun tut ed il pop era ius suenter. El era in pop forsa da dus, treis onns, ed era ius da quella scala giu, ina scala da crap e ruclaus e veva fatg ina scurlada dil tschurvi e quei savevan ei halt da lezs onns halt era nuot. Ei han priu si il pop e forsa mess in mument a letg epi suenter eis ei stau bien. Aber el era lu vegnius ordlunder in tec in pauper schani. Il davos er’el vegnius ch’el era vegnius dad ir a scola, ch’el saveva scriver e leger aber el vegneva lu mintgaton vilaus….

Tgei lavurs fageva lu il frar?

Lez fageva lu aunc bia cul bab, far ora lenna. El era pia dus, treis onns pli vegls ch’jeu. Lu igl emprem onn da scola, cu jeu sun ida ha el era stuiu ir. E leu vein nus adina mirau ch’el vegni sper mei ed jeu stuevel volver la tabla ch’el sappi mirar tgei ch’jeu hagi scret ed el sappi scriver giu. Ed aschia er’el vegnius ch’el saveva leger e scriver. Aschia certas caussas savev’el schon far.