Gasettas vevan nus la Romontscha, il Tagblatt epi il bab veva duront l’uiara extra abonnau “Die Züricher Zeitung”. Quella veva lu en in tec pli bia, per ch’el seigi sil current. Epi dev’ei lu aunc Il pelegrin, Igl ischi, Il tschespest, il calender romontsch. Jeu ligevel bugen.

Nus vevan mo radio, bu televisiun.  Nus vevan schon da lezs temps ina pintga biblioteca el vitg, nua ch’ins saveva ir per cudischs. Il bab veva sez era dabia cudischs che nus ligevan. Magari mava il bab era per in cudisch tudestg, buca schi grev da leger per che nus emprendien era in tec tudestg.

Dev’ei inaga ni l’autra daquels che discurrevan tudestg en vischnaunca?

Jeu sai che nus vevan inaga in postenent che tschintschava mo pauc romontsch. Lu era il traffic dad jasters bu schi bia. Autos dev’ei era paucs. Jeu sai ch’jeu vevel stuiu ir tut anetg el spital perquei ch’il begltschiec era ruts ora.. e quei era il sulet auto en vischnaunca e quei um luvrava en fabrica a Trun. Jeu vevel stuiu spitgar tochen ch’el vegni ord fabrica e quel vegneva buc e vegneva buc. Miedi vevan nus si Mustér in ed in giu Trun e pli tard lu vi Rabius. Quel era lu per tut quels vitgs.

Quel da Mustér veva gnanc auto, quel vegneva cun ina Vespa. Quel da Trun crei jeu era. Quel vegneva perfin biaga cun skis. Schiglioc era quei nuot. Jeu sai aunc culla giuventetgna, sch’ei era forsa inaga in teater zanua pli lunsch lu empustav’ins la schlettra cul cavagl e mava in per ensemen. Quei era lu il detg gaudi. Quei era sco sch’ins vess fatg sappatgei bravura. Ils trens mavan lu era bu grad schi savens, quei era mo forsa dus avon- e dus suentermiezdi ni encunter sera. Quei sains bu propi metter avon oz.