Co era quei lu sch’ins stueva haver il veterinari ni il miedi? Gnevan quels a pei ni duvrav’ins insumma buca quels?En scadin cass aschi pauc sco pusseivel. Avon che la via ei vegnida stuevan quels ir tut a pei. Naven da Cons ei la via vegnida pér il 1949. E propi pli baul vegneva il miedi da casa aunc cun cavagl e da Cons a Ligiazun prendeva quel la scarsola. Pli tard han il miedi ed era il vetrinari mess neu auto.

Aber veterinari e miedi vegnevan clamai mo en cass fetg urgents.

Gliez schon, aber enqualgadas ha il miedi era fatg pli bia donn che gudogn. Da femnas che han giu affons e quels vessen giu da schar ir en spital ed ein mortas enstagl a casa. Ferton ch’ins duvrava pli baul jarvas va ei ozilgi en general tut cun perlas.

Aber anavos sil stan medicinal da pli baul turnasses era buca pli.

Na insumma buca. Aber quei dad oz schazeg’jeu era buca tut.

Sco pur empruav’ins era da tractar tut quei ch’era pusseivel sez.

Tier la palusa schetga schev’ins ora saung, quei fagev’ins in snez ella grefla ni sur il calzer pign. Pli tard han ei pretendiu ch’il saung ch’ins laschi ora infecteschi tschella biestga. Forsa ch’igl ei enzatgei vidlunder aber sch’ins fageva quei ad uras eri il bia bien. Sche las vaccas havevan magari igl iver che mava si, lu scheva miu bab ora saung digl iver. Jeu hai era aunc fatg quei. Il bia vegnev’ei bien, aber jeu hai era giu ch’ei falliu e la vacca ei vegnida da treis.