Anavos tier vies temps d’affonza. Da tgei saveis vus aunc seregurdar?

Cun quater onns ei miu frar vegl morts. Quel havev’ins stuiu ir ora en spital a Glion cun tut, el haveva giu quell’inflammaziun dil begl tschiec sco aunc biars. Ins haveva schau cheu el e spitgau memia gitg ed il begl tschiec era ruts ora, ins ha operau el ed el ei vegnius a casa, ha denton stuiu ir enzacons gis pli tard puspei anora ed ei morts lu.

Nua essas vus i a scola?

Ils emprems tschun onns sun jeu ius a scola oragiu Cons. Igl emprem che jeu sun ius oragiu leu, mavan aunc otg classas leu a scola.

E mo in scolast.

Gie, e naven dil sisavel onn essan nus i ora vitg, pia a Vrin. Igl emprem onn da scola ora vitg stuevan nus far in examen enzatgei, sch’ins seigi habels da far insumma quella classa. Schiglioc tarmattevan ei anavos in ni l‘auter.

Cons affons mavan lu a scola a Cons?

Cu jeu sun ius a scola eran quei aschi 30 scolaras ni scolars. Oz (2016) ei la scola a Vrin serrada.

Da miezgi tuccav’ei da vegnir a pei mintga gi si Ligiazun a gentar.

Entasi da Cons era quei buca nauscha caussa. Naven dallas endisch entochen l’ina havev’ins peda ed ins mava alla cuorta d’in trutg oragiu. Era cu nus mavan a scola oragiu vitg eri da vegnir entasi cheu a gentar e quei en tutt’aura. Cu ei era in terment zuffel e biara neiv era quei buca legher.