Cor er’ei sch’enzatgi mureva?

Cu enzatgi mureva, vegneva ei detg rusari a casa. Nus vein lu giu cheu la caplutta da morts pér anno 1992. Avon era la bara casa ed ei vegneva detg rusari da morts, magari tochen mesanotg.

In tec allaga ei quei lu era svaniu. Schilunsch era quei endretg aber per la famiglia era quei schon aunc heftis dis. Haver la bara en casa veva siu bien e siu schliet, la stad cu ei era cauld, era quei meins emperneivel.

Tgei usits deva ei tier vus?

Sper ils usits da baselgia vevan nus cheu era il tscheiver. Cu nus eran giuvens vegnev’ei fatg inaga ad onn tscheiver. Da vegnir pri si ella giuventetgna dev’ei negins rituals pli specials.Cheu Surrein er’ins lu ella cumpignia da mats ni ell’uniun da giuvnas. Da quels onns era quei aunc separau.

La cumpignia da mats veva sias radunonzas e las giuvnas vevan lur radunonzas. Ils mats vevan da far parada, secapescha. Quater giuvnas vevan da purtar Nossadunna. Far tschupials per las fiastas. Cu jeu erel giuvens vein nus giu treis messas nuvialas e quei vevan nus fatg gronda breigia cun far tschupials e far bi. Jeu sai tier ina messa nuviala er’ei stau ina sera ch’ei fagevan tschupials e lu vevan ei giu da sefar ed eran vegni malperina.