Lu devi bia camonds ed era scamonds per la societad.

Il cussegl communal haveva scumandau da saltar ellas ustrias. Dallas quater fiastas astgavas buca dar jass entochen las tschun. Quei era totalmein falliu. La consequenza era che dallas quater fiastas eri il pli biars stuorns e lu devi da sescagnar, sedar ni gir si aviras.

 Enzatgei che vus haveis fatg dabia era ir cun skis. Vus eras in excellent skiunz.

Jeu mavel buca dabot aber jeu mavel forsa il bein da lezs onns. La dumengia suenter messa vegneva adina iu cun skis. Encunter miu frar Marcel havevel jeu ella cuorsa rapida buca schanza. Jeu sai aunc che nus fageva cheu sur il vitg la cuorsa rapida, lu mavan nus enta Vilegn a far cuorsa liunga e suenter a far slalom el seniester dalla Val Craps, tut il medem gi. Jeu hai giu igl emprem auto da persunas enta Vrin igl onn 1954 e lu era quei dad ir cun quels empau dapertut, tochen sigl Alpsu essan nus stai a far cuorsas.

Vus haveis giu igl emprem auto enta Vrin. Era quei lu era da far transports per auters?

Cun miu Peugeot devi adina puspei da far in survetsch ni l’auter. Transportar nozzadurs, ir cun persunas malsaunas tiel miedi ni en spital, far transports da tiers manedels ni da rauba, ir per paders ni prers hospitonts eav., quei schabegiava adina puspei. Il problem era che quei auto perdeva magari ina roda. Quei auto haveva custau 2800 francs.