Vus rimnavas era a casa jarvas per far te?

Gie, gie, per far te e far mèl. Mèl fagev’ins sez. La mumma veva puaunas e puma ed il bab veva lu in detg curtin. Ed il fegl cheu, gliez tila era il bab en quei cass. El ha da quei d’otgonta plontas. Massa plontas. Quei ei lu fretgs – auter ch’ils cumprai! El ei staus giu ed ha fatg il Plantahof. Gliez capesch’el schon vid la puma. Els fan eba aunc bia quels aperos per da nozzas e leu fan ei era bia spisas sco maluns e buglia-meila suveschan ei tier.

Pli baul enconuschevas Vus tut las jarvas e quei che carscheva?

Las biaras schon. La mumma, jarvas encurev’ella bia. Ella metteva en ina sadiala e scheva seccar tut ell’umbriva. Epi sun jeu stada, cu il Seppli era carschius, si Duin ina dumengia. Ina veva fatg in referat e tgi che lev’ir saveva ir. Quella veva detg da quasi mintga fein ch’ins entaupi sappi ins ver enzatgei, ins dueigi ver schanetg e risguard dil fretg dil prau. Quei ei schon ver. Ins sa lu prender en epi tut secchentar ell’umbriva. Surtut ell’umbriva! Epi lu, cu igl ei sec, sains mischedar ensemen tut e far te.

Medischina fagevas Vus era sezs?

La mumma fageva giu quellas salbas. Ella fageva giu quei seiv, grass, specialmein dallas tgauras ni dals camutschs ni aschia. quei era schon lu fetg grass. Per prender en er’ei buca da cussegliar aber per unscher en.

Vus mavas bu traso tiel miedi?

Jeses, na. Il docter Nay veva detg lu – saveis, quels da Surrein han halt igl unviern in per meins bu sulegl ed els ein vegni tras quei robusts e ferms. Magari in tec zuccher-candel duvrav’ins lu per te dalla tuos. E secapescha in tec vinars epi metter en da quellas jarvas. Quei gida, quei rumpa si la tuos epi eis ei era bu calorias.