Co veis Vus empriu d’enconuscher Vies um?
Jeu erel adina mo stada naven e stada naven epi erel jeu denter auter stada en quei Schweizerhof sco guvernanta. Quei er’in hotel che mava bein. Il directur derivava dil Appenzell epi sun jeu sepresentada ed hai saviu ir a luvrar. Jeu erel stada dus, treis onn leu e viu bia caussas. Epi era caussas ch’ins saveva buc. Sch’ins era giuvens e carteva quei ch’il bab e la mumma vevan detg, quei era sontga scartira. E quei che nies bien augsegner, era in da Tujetsch, ch’era aunc da tschels onns. Quei era in sgarscheivel scrupulus e quel veva mess avon mo il parvis ed igl uffiern.
Denter auter er’ei lu vegniu ch’ils da Rabius vevan fatg perdanonza e leu hai jeu entupau miu um. Nus era lu stai leu ditg e liung e paterlau e paterlau, ed in fil trai l’auter. … El ei ius a casa ed jeu era. Ed in bi di ha el scret in brev.
Mia sora era quels onns a Turitg e cu jeu vevel liber mavel jeu savens tier ella. Lezza veva detg ch’ella hagi ina combra nua ch’ella sappi schar ir en. Epi secapescha, eis el vegnius oragiu e nus essan i in tec per quei marcau entuorn a mirond. La sera essan nus i a mirar il film …also il pli vegl film ch’ei sa bunamein dar, ei setractava da purs e vi e neu epi secapescha essan nus vegni bunamein in tec “verliebt” epi el a scret ed jeu hai scret epi essan nus suenter in onn sedecidi da maridar.
Jeu vevel detg: jeu stun aunc miez onn cheu e fadigel zacons raps epi savien nus silmeins in tec tablegiar ora ina combra duas e la stiva in tec. Aber jeu hai lu stuiu spitgar bu ditg ch’ils meisters vevan detg che la stiva e la cuschina seigi schon pinau, jeu sappi schon vegnir. Jeu vai lu fatg prescha (ri) e sun stada 60 onns el vitg, vi Sumvitg, neu da Surrein. Jeu sun vegnida ord l’umbriva neu el sulegl. Miu um ei staus in bien. Pils affons eis el staus in ver bab ed era cun mei eis el staus in bien um, veramein. Nus vein giu bia bi, veramein. Nossas grondas vacanzas eran quellas dad ir el misès. Cu ins mava lu vin misès magari ch’jeu fagevel ina petta ni zatgei in per tustgets ch’ins sappi prender. E quei era lu nossas vacanzas.
Vus eras ventireivels e savevas schazegiar
Gie, nus eran cuntents cun nuot.