Vus essas era stai a catscha enta Vrin. Co era la catscha lu?

Igl emprem cu jeu sun ius a catscha eran a Vrin quels catschadurs vegls che havevan la catscha quasi sco caussa principala el tgau. Per quels era ei schon impurtont da sittar bia, far ina buna catscha, haver sche pusseivel siu agen revier ch‘auters semischeidien buc en. Quei ei vegniu culs onns pli raschuneivel. La glieud era buca pli mo sin la preda. Per biaras famiglias era quei in stuer bunamein. Da lezzas uras mav’ins a catscha per metter enzatgei sin meisa e buca pil plascher. Jeu sai che quels catschadurs vegls sch’ei vegnevan buca da sittar ils camutschs (lu la preda principala) el temps da catscha lu mavan els igl october si Ramosa e sittavan els. Quei negin che s’empitschava dalla caussa. Era il temps da catscha pendev’ins buca si enzatgi tier falliments sch’ins saveva che quel seigi dependents da quella catscha. In castitg havessen quels buca saviu pagar e serrar en fuss era buca stau ina sligiaziun.