Tgei occupaziuns deva ei duront il temps che la buobanaglia haveva buca scola?

La scola fineva entuorn ils 20 d’avrel. 28 jamnas havevan nus scola, otg onns alla liunga. Autras vischnauncas havevan 26 jamnas scola ad onn, persuenter mavan els nov onns a scola. L’occupaziun denter la scola era igl unviern far lavurs en nuegl, cauras e nuorsas da perver e buentar e lu era ei da mirar ch’ei hagi aua e lenna en cuschina. Quellas lavurs tuccavan pli u meins a mintgin. Il temps liber sedivertev’ins sin ina moda ni l’autra. Sch’ei haveva buca neiv er’ins ensemen da cumpignia e fageva giugs. Igl unviern mavan nus cun skis ni scarsola. Ils skis survegnev’ins dalla scola. Buca tuts moderns, mo els fagevan lur survetsch. La primavera suenter che la scola era a fin tuccav’ei da far lavurs sil funs.

Per ordinari era l’occupaziun dils buobs d’empalar ils bos, ei setractava da menar grascha, trer si zugl e d’arar. Siat, otg lidimers haveva mintga menaschi da trer ora. Denter ils 15 ed ils 20 da matg mav’ins a mises. Sin pastira er’ei lubiu da schar ir la biestga naven dils 20 da matg, sch’ei haveva lu pastg ni buca. Ils buobs havevan lu da far ils pasturs. Quell’occupaziun cuzzava entochen la cargada. Tenor l’aura ch’ei fageva era quei ils 20 da zercladur ni forsa era pér l’entschatta fenadur. La gronda part dils buobs da Vrin tarmettev’ins ad alp. La carriera alpestra entschaveva sco purtger – quel haveva da far il sufla il tgil a tuts – lu cuntinuava la carriera sco paster, zezen e signun. Pils buobs era quei ualti dir. Per ina era ei miserabels baghetgs d’alp, quels purs che havessen pudiu star ora da far enzatgei vid las tegias ein stai ils davos che han fatg enzatgei. Suenter la scargada vegneva il trasar. Pils buobs era quei atgnamein il pli bi temps digl onn. Il sulet cunfin era quel denter tras su e tras sut. Schiglioc saveva la biestga ir nua ch’ella leva. Miez october era ei puspei da prender neunavon igl uorden da scola.