Saveis Vus seregurdar da disgrazias ni malauras?

Jeu sai bu seregurdar dad auas grodas aber jeu sai ch’ils geniturs raquintavan. Propi er’ei il Rein dalla Val Sumvitg che vegneva viado. Cu ei era mallaura vev’ins schon in tec sterment.

Jeu sai che la mumma mirava sil Rein e scheva mirei co ei vegn giuado plontas. Quei fageva schon in tec sgarschur.

Cun tgei scaldavas Vus?

Nus vevan da scaldar tut cun lenna, cun pegnas scalegl. Quei era scaldau mo la stiva. Pli tard veva il bab schau far ellas combras ina pintga pegna scalegl. Quella scaldava lu la combra dils buobs e quella dallas buobas. Quei era per omisduas combras. Schiglioc era quei schon biagadas ferdaglia, cheu Surrein sowieso. Jeu sai che jeu mavel vi Sumvitg a scola secundara. Jeu vevel grossas terscholas e lu scursanevan nus adina giu, mavan suenter il Rein viaden e dalls plauncas si. Quellas terscholas eran tut scheladas cu jeu erel vi. En scola scaldav’ins era cun lenna. Quei era ina dunna che fageva pedela e scaldava lu sin che nus vegnevan. Electricitad vevan nus schon per la cazzola.

Nus mavan da buobanaglia biaga mo sin in puoz, sch’ei era bess in tec aua, mavan nus en palas. Quei era bu patinas aber lu vev’ins quels calzers cun en guotas e quei mava grad sco cun patinas. Lu vevan nus fatg palas, quei er’adina tut plein. Quei era lu il sport. Quei era da vegnir ord scola ed aunc dabot ad ir en palas.