Vus essas era stai meinacudisch dalla societad da tratga da biestga e cassier da vischnaunca. Co veseva in rendaquen communal ora da lezzas uras? Da tgei summas setractav’ei?

Igl emprem era quei da purtar en tabellas da taglia las entradas, sco per exempel la taglia sin la vusch. La vusch virila custava 5 francs, quella taglia haveva mintgin da pagar, era las femnas che havevan negin dretg da votar. Igl emprem cu jeu hai fatg cassier, quei ei stau il 1961, vegneva ei ensemen en quella gliesta da taglia circa 20’000 francs. Suenter ei quella summa carschida in tec alla gada sin 200’000 francs. Auter che quellas taglias mava quei buca biars daners tras la vischnaunca. Las pagas dils scolasts pagava il cantun la mesadad e tschella vegneva ulivada dalla vischnaunca. Quei ei lu semidau cul temps e las vischnauncas han stuiu pagar pli tard ils cuosts pil scolaresser tenor forza finanziala. Tut en tut figuravan el cudisch da cassa igl emprem circa 60’000 francs.

Tgei incumbensas haveva ina vischnaunca?

La vischnaunca haveva da procurar che tut igl uorden funcziuni, naven dil cavrer tochen tier il scolast e la lavur cumina.

Tgei paga havevas vus lu?

Jeu hai entschiet cun 600 francs paga annuala ed il president haveva 500 francs.