Co veseva in gi normal ora tier vus en vossa affonza?

In gi da scola era fixaus. Ei era da levar in quart dallas siat, allas 7.15 eri messa da scola, allas 8.00 scola entochen las 11.00. Suenter la tschavera da miezgi eri da buentar las cauras e nuorsas. La sera allas 16.00 era la scola finida. Lu dev’ei marenda ed ei deva puspei da luvrar en nuegl, ir per aua e lenna e sch’ins haveva in per minutas liber er’ins sin via.

 L’electricitad ei vegnida bia pli tard enta Vrin. Co fagevas vus ils pensums da scola la sera?

Quei era buca problem, ins haveva la cazzola da petroli en stiva. Quei tunscheva per leger e scriver.

E la dumengia co era quella structurada?

La messa era per ordinari dallas 9.00 ni allas 9.30. Suenter gentar allas 13.00 er’ei viaspras e duront il temps da scola era mintga sera rusari. Tschei temps havev’ins a disposiziun per far giugs ni far ina tura siadora els mises.